మోదీ ఏరియల్ సర్వే.. కేరళకు రూ. 500 కోట్ల సాయం ప్రకటన

కొచ్చి: కుండపోతవానలతో తల్లడిల్లిపోతోన్న కేరళలో ప్రధానమంత్రి నరేంద్ర మోదీ పర్యటిస్తున్నారు. వరద ప్రభావిత ప్రాంతాల్లో ఆయన హెలికాఫ్టర్ ద్వారా ఏరియల్ సర్వే జరిపారు. కేరళ సీఎం పినరాయి విజయన్, కేంద్ర మంత్రి అల్ఫోన్స్‌తో కలిసి ఆయన వరద ప్రభావిత ప్రాంతాల్లో ఏరియల్ సర్వే నిర్వహించారు.

ఏరియల్ సర్వే జరిపిన వెంటనే ప్రధాని మోదీ కేరళకు 500 కోట్ల రూపాయల సాయం ప్రకటించారు. ఈ సహాయం గతంలో ప్రకటించిన వంద కోట్ల రూపాయలకు అదనం. వరదల్లో చనిపోయినవారి కుటుంబాలకు 2 లక్షల రూపాయల పరిహారం ప్రకటించారు. గాయపడినవారికి 50 వేల రూపాయల ఎక్స్‌గ్రేషియా ప్రకటించారు. కేరళకు అండగా ఉంటామని మోదీ హామీ ఇచ్చారు.

అంతకు ముందు ఆయన వరద పరిస్థితులపై కొచ్చిలో అధికారులతో సమావేశమై వరద పరిస్థితిని సమీక్షించారు. త్రివిధ దళాలు, ఎన్డీఆర్‌ఎఫ్ బృందాలు చేపడ్తోన్న సహాయక చర్యలను సమీక్షించారు. ఈ సమావేశంలో కేరళ సీఎం పినరాయి విజయన్, కేంద్ర మంత్రి అల్ఫోన్స్, కేంద్ర, రాష్ట్ర ఉన్నతాధికారులు పాల్గొన్నారు.

కొద్ది రోజులుగా కుండపోత వర్షాలకు కేరళలో ఇప్పటివరకూ 324 మంది చనిపోయారు. లక్షలాది మంది నిరాశ్రయులయ్యారు. బాధితులు సెద్ద సంఖ్యలో సహాయక శిబిరాల్లో తలదాచుకుంటున్నారు.

Be the first to comment

Leave a Reply

Your email address will not be published.


*