గడ్కరీతో కీలక అంశాలపై చర్చించిన కేసీఆర్

న్యూఢిల్లీ: ముఖ్యమంత్రి కె.చంద్రశేఖర్ రావు న్యూఢిల్లీలో కేంద్ర జల వనరులు, ఉపరితల రవాణా శాఖ మంత్రి నితిన్ గడ్కరీని కలిసి, రాష్ట్రానికి సంబంధించిన పలు అంశాలపై చర్చించారు. పలు వినతి పత్రాలు సమర్పించారు.

కృష్ణా నదీ జలాల వినియోగానికి సంబంధించిన వివాదంలో సరైన న్యాయం జరగాలంటే, ఈ అంశాన్ని కృష్ణా వాటర్ డిస్ప్యూట్ ట్రిబ్యునల్ -2 (KWRT-2) కు అప్పగించాలని ముఖ్యమంత్రి కేసీఆర్ కేంద్ర మంత్రిని కోరారు. ఇంటర్ స్టేట్ రివర్ వాటర్ డిస్ప్యూట్స్ ఆక్ట్ (ISWR) సెక్షన్ 3 ప్రకారం మొత్తం కృష్ణా బేసిన్ లో పునఃపంపిణీ జరగాలని కేసీఆర్ కోరారు. ఆంధ్రప్రదేశ్ పునర్విభజన బిల్లు సెక్షన్ 89 ప్రకారం కృష్ణా నదీ జలాల కేటాయింపు అంశాన్ని బ్రిజేష్ కుమార్ ట్రిబ్యునల్ కు అప్పగించారని, ఈ ట్రిబ్యునల్ కేవలం తెలంగాణ, ఆంధ్రప్రదేశ్ రాష్ట్రాల మధ్య జలాల పంపిణీ అంశానికే పరిమితం అని సిఎం చెప్పారు. దీని వల్ల తెలంగాణ రాష్ట్రానికి న్యాయం జరగదని, కృష్ణా నదీ జలాల కేటాయింపులో తెలంగాణకు బచావత్ ట్రిబ్యునల్ లోనే అన్యాయం జరిగినందున, మొత్తం కృష్ణా జలాల విషయంలో మళ్లీ పంపకం జరపాలని సిఎం కోరారు. కాబట్టి ఈ అంశాన్ని బ్రిజేష్ కుమార్ ట్రిబ్యునల్ కు పరిమితం చేయకుండా, ఐ.ఎస్.డబ్ల్యు.ఆర్. చట్టంలోని 3వ సెక్షన్ ప్రకారం విచారించాలని సిఎం విజ్ఞప్తి చేశారు. తెలంగాణ రాష్ట్రం ఏర్పడిన కొత్తలోనే ఇదే విజ్ఞప్తిని చేశామని, ఈ తర్వాత కూడా అనేక సందర్భాల్లో తాము ఈ డిమాండ్ చేస్తున్నామని కేంద్ర మంత్రి దృష్టికి కేసీఆర్ తెచ్చారు.

తెలంగాణ రాష్ట్రంలో గోదావరి నదిపై నిర్మిస్తున్న సీతారామ ప్రాజెక్టు కొత్త ప్రాజెక్టు కాదని, దీని పాత ప్రాజెక్టుగానే గుర్తించాలని, దీనికి సంబంధించి కేంద్ర జల సంఘానికి ఆదేశాలు జారీ చేయాని ముఖ్యమంత్రి కేసీఆర్ కేంద్ర మంత్రి గడ్కరీని కోరారు. సమైక్య రాష్ట్రంలోనే 2005లో రాజీవ్ దుమ్ముగూడెం లిఫ్ట్ ఇరిగేషన్ స్కీమ్, ఇందిరాసాగర్ రుద్రమకోట లిఫ్ట్ ఇరిగేషన్ పేర్లతో గోదావరి నదిపై ప్రాజెక్టులు మంజూరైన విషయాన్ని కేంద్ర మంత్రి దృష్టికి తెచ్చారు. 2007లోనే ఈ రెండు ప్రాజెక్టుల పని ప్రారంభమయిందన్నారు. తెలంగాణ ఏర్పడే నాటికే ఈ రెండు ప్రాజెక్టులకు కలిపి 1,771.16 కోట్లు ఖర్చు చేశారన్నారు. ఇందిరా సాగర్ హెడ్ వర్స్క్ ఉన్న ప్రాంతం ఆంధ్రప్రదేశ్ లో కలవడంతో పాటు, వణ్యప్రాణుల సాంక్చురీకి ఆటంకం కలుగకుండా తాము ప్రాజెక్టును రీ డిజైన్ చేశామని సిఎం చెప్పారు. అంతర్రాష్ట్ర వివాదాలు తలెత్తకుండా ఉండడం కోసం ప్రాజెక్టు హెడ్ వర్క్స్ ను తెలంగాణ భూభాగానికి మార్చామని, వన్యప్రాణులకు హానీ కలుగకుండా అలైన్ మెంట్ మార్చామని చెప్పారు. ఈ రెండు ప్రాజెక్టులను కలిపి, ఒకే ప్రాజెక్టుగా నిర్మిస్తున్నామని, దీనికి సీతారామ అనే పేరు పెట్టామని వివరించారు. ప్రాజెక్టు డిపిఆర్ ను కూడా కేంద్ర జలసంఘానికి పంపామని, కేంద్ర జల సంఘం అనుమతుల కోసం గోదావరి రివర్ మేనేజ్మెంట్ బోర్డుకు పంపినట్లు తెలిసిందన్నారు. గోదావరి రివర్ మేనేజ్మెంట్ బోర్డు పరిధి కొత్త ప్రాజెక్టులకు సంబంధించి ఉంటుందని, సీతారామ ప్రాజెక్టు దాని పరిధిలోకి రాదని చెప్పారు. ప్రాణహిత-చేవెళ్ల ప్రాజెక్టును రీడిజైన్ చేసి కాళేశ్వరం ప్రాజెక్టుగా మార్చినట్లే, పాత ప్రాజెక్టును సీతారామ ప్రాజెక్టుగా మార్చామన్నారు. కాళేశ్వరం ప్రాజెక్టును పాత ప్రాజెక్టుగా పరిగణించినట్లే, సీతారామను కూడా పాత ప్రాజెక్టుగానే పరిగణించాలని సిఎం కోరారు.

సంగారెడ్డి-నర్సాపూర్-తూప్రాన్-గజ్వేల్-జగదేవ్ పూర్-భువనగిరి-చౌటుప్పల్ మీదుగా వెళ్లే 154 కిలోమీటర్ల రహదారిని, చౌటుప్పల్-యాచారం-షాద్ నగర్- చేవెళ్ల- శంకర్ పల్లి- కంది మీదుగా వెళ్లే 180 కిలోమీటర్ల రహదారిని జాతీయ రహదారిగా విస్తరించేందుకు అంగీకరించినందుకు కేంద్ర మంత్రికి ముఖ్యమంత్రి కృతజ్ఞతలు తెలిపారు. ఈ రెండు రహదారులు హైదరాబాద్ నగరానికి రీజనల్ రింగు రోడ్డుగా మారుతున్నాయని వివరించారు. ఇది హైదరాబాద్ నగరానికి కేవలం 50-60 కిలోమీటర్ల దూరంలోనే ఉంటుందని, తెలంగాణ రాష్ట్ర పురోగతిలో ఈ రహదారి కీలక పాత్ర పోషిస్తుందని సిఎం చెప్పారు. సంగారెడ్డి-చౌటుప్పల్ రహదారిని జాతీయ రహదారిగా గుర్తించి, విస్తరణ పనుల కోసం ఎన్.హెచ్.ఎ.ఐ.కి అప్పగించారని, చౌటుప్పల్ – కంది రోడ్డును ఇంకా నోటిఫై చేయాల్సి ఉందని కేంద్ర మంత్రి దృష్టికి తెచ్చారు. 150 అడుగుల వెడల్పుతో ఆరు లేన్ల రోడ్డు నిర్మించడానికి రూ.11వేల కోట్ల అంచనాతో తాము ప్రతిపాదనలు సిద్ధం చేశామని, దానికి అనుగుణంగానే నిధులు కేటాయించాలని సిఎం కోరారు.

167 నంబరు జాతీయ రహదారిలో జడ్చర్ల-మహబూబ్ నగర్ మధ్య 15 కిలోమీటర్ల నాలుగు లేన్ల రోడ్డు నిర్మించాని సిఎం కోరారు.
తెలంగాణ రాష్ట్రంలో 2వేల కిలోమీటర్ల మేర రహదారిని నాలుగు లేన్ల రోడ్లుగా మార్చేందుకు ఎన్.హెచ్.ఎ.ఐకి అప్పగించారని, ఇందులో 1000 కిలోమీటర్లలో విస్తరణ జరిగిందని సిఎం చెప్పారు. మరో 400 కిలోమీటర్లలో పని పురోగతిలో ఉందన్నారు. అయితే మిగిలిన 600 కిలోమీటర్ల పనులు టెండర్ దశలోనే ఉన్నాయని, ఈ రహదారులు బాగా పాడై పోయినందున మరమ్మత్తుల కోసం నిధులు ఇవ్వాలని సిఎం కోరారు.
తెలంగాణ రాష్ట్ర పిడబ్ల్యుడి ద్వారా నిర్వహిస్తున్న జాతీయ రహదారుల అభివృద్ధికి 2016-17 ఆర్థిక సంవత్సరంలో రూ.2,635 కోట్లు, 2017-18 ఆర్థిక సంవత్సరంలో రూ.3,030 కోట్లు మంజూరు చేసినందుకు కేంద్ర మంత్రికి సిఎం కృతజ్ఞతలు తెలిపారు. అయితే 2018-19 ఆర్థిక సంవత్సరంలో కేవలం రూ.353 కోట్లకే అనుమతులకు పరిధి విధించారని సిఎం కేంద్రమంత్రి దృష్టికి తెచ్చారు. తెలంగాణ రాష్ట్రంలో 3,600 కిలోమీటర్ల జాతీయ రహదారిని రాష్ట్ర పిడబ్ల్యుడి నిర్వహిస్తున్నదని, వీటి నిర్వహణ కోసం ఈ ఏడాది రూ.3,000 కోట్ల నిధులు సమకూర్చాలని కోరారు.

 

రాష్ట్రంలో పలు రాష్ట్ర రహదారులను జాతీయ రహదారులుగా గుర్తించినందుకు కేంద్ర మంత్రికి సిఎం కృతజ్ఞతలు తెలిపారు. కానీ ఈ రహదారుల నిర్మాణానికి సంబంధించి అలైన్మెంట్, గెజిట్ నోటిఫికేషన్లు రావడంలో ఆలస్యం జరుగుతోందని కేంద్ర మంత్రికి వివరించారు. చౌటుప్పల్-కందికి అలైన్మెట్, నోటిఫికేషన్ ఇవ్వాల్సి ఉందన్నారు. మెదక్-సిద్దిపేట-ఎల్కతుర్తి రోడ్డును నోటిఫై చేయాలన్నారు. కరీంనగర్-సిరిసిల్ల-పిట్ల రహదారికి అలైన్మెంట్, నోటిఫికేషన్ ఇవ్వాల్సి ఉందన్నారు. గౌరెల్లి-వలిగొండ-మహబూబాబాద్-కొత్తగూడెం రహదారికి నోటిఫికేషన్ ఇవ్వాలని, మెదక్-రుద్రూర్ రహదారికి నోటిఫికేషన్ ఇవ్వాలని, బోదన్-బాసర-భైంసా రహదారికి వెంటనే నోటిఫికేషన్లు జారీ చేయాలని, దుద్దెడ-సిద్దిపేట-సిరిసిల్ల రహదారికి అలైన్మెంట్ అనుమతి ఇవ్వాలని కేంద్ర మంత్రి దృష్టికి తెచ్చారు.

జాతీయ రహదారులను గ్రీన్ హైవేలుగా మార్చేందుకు తెలంగాణ రాష్ట్ర ప్రభుత్వం తీసుకున్న ప్రతిష్టాత్మకమైన తెలంగాణకు హరితహారం కార్యక్రమం ద్వారా పెద్ద ఎత్తున మొక్కలు నాటుతున్నట్లు కేంద్ర మంత్రికి సిఎం వివరించారు. జాతీయ రహదారుల పక్కన మొక్కలు పెంచే బాధ్యత వర్క్ ఏజన్సీలు, నిర్వహణ సంస్థలదే అయినా, వారు సరిగా నిర్వహించడం లేదని సిఎం చెప్పారు. ప్రాజెక్టు నిర్మాణంలో భాగంగా మొక్కలు నాటినప్పటికీ, వాటి సంరక్షణ సరిగా లేదని వివరించారు. జాతీయ రహదారుల వెంట మొక్కలు నాటడం, వాటిని సంరక్షించడం లాంటి పనులను అనుభవం, యంత్రాంగం కలిగిన రాష్ట్ర అటవీశాఖకు అప్పగించాలని కోరారు. దీనివల్ల జాతీయ రహదారులను గ్రీన్ హైవేలుగా మార్చే లక్ష్యం నెరవేరుతుందని సిఎం అభిప్రాయపడ్డారు.

Be the first to comment

Leave a Reply

Your email address will not be published.


*