విజయవాడలో జాతీయ సరస్‌ మేళా–2026.. ప్రారంభించనున్న రాష్ట్రపతి ద్రౌపది ముర్ము..

• తొలిసారి ఢిల్లీ వెలుపల గ్రాండ్ ఈవెంట్..
• పున్నమి ఘాట్‌లో అక్టోబర్ 13 నుంచి 31 వరకు వేడుకలు..
• 30కి పైగా రాష్ట్రాల నుంచి తరలిరానున్న 1,500 మంది మహిళా వ్యాపారవేత్తలు..

విజయవాడ, అక్టోబర్ 12, ఈ క్షణం: ఆంధ్రప్రదేశ్ రాష్ట్ర వ్యాపార, సాంస్కృతిక రంగానికి మరో ప్రతిష్టాత్మక గుర్తింపు లభించింది. గ్రామీణ మహిళా వ్యాపారవేత్తల ఉత్పత్తులకు జాతీయ స్థాయిలో మార్కెట్ అవకాశాలు కల్పించే మహోన్నత లక్ష్యంతో కేంద్ర గ్రామీణాభివృద్ధి మంత్రిత్వ శాఖ, ఆంధ్రప్రదేశ్ ప్రభుత్వ సంయుక్త సహకారంతో ‘జాతీయ సరస్‌ మేళా–2026’ (National Saras Mela 2026) ను విజయవాడలో నిర్వహించేందుకు అన్ని ఏర్పాట్లు పూర్తయ్యాయి.

ఢిల్లీ–ఎన్‌సీఆర్ (Delhi-NCR) ప్రాంతం వెలుపల భారతదేశంలోనే తొలిసారిగా ఈ జాతీయ మేళాను విజయవాడలో నిర్వహిస్తుండటం విశేషం.

ఈ నెల అక్టోబర్ 13 నుంచి 31వ తేదీ వరకు విజయవాడలోని ప్రసిద్ధ పున్నమి ఘాట్‌లో ఈ మేళా కొనసాగనుంది. ఈ నెల 15న ఉదయం 11.30 గంటలకు భారత రాష్ట్రపతి ద్రౌపది ముర్ము ఈ ప్రదర్శనను అధికారికంగా ప్రారంభించనున్నారు.

దిగ్గజ నాయకుల కలయిక..

ఈ చారిత్రాత్మక ప్రారంభోత్సవ కార్యక్రమానికి ఆంధ్రప్రదేశ్ గవర్నర్ ఎస్. అబ్దుల్ నజీర్, ముఖ్యమంత్రి నారా చంద్రబాబు నాయుడు, కేంద్ర వ్యవసాయ, గ్రామీణాభివృద్ధి శాఖ మంత్రి శివరాజ్ సింగ్ చౌహాన్, ఉప ముఖ్యమంత్రి కొణిదెల పవన్ కల్యాణ్ ముఖ్య అతిథులుగా హాజరుకానున్నారు. వీరితో పాటు కేంద్ర పౌర విమానయాన శాఖ మంత్రి కింజరాపు రామ్మోహన్ నాయుడు, పలువురు కేంద్ర, రాష్ట్ర మంత్రులు, ప్రజాప్రతినిధులు భాగస్వాములు కానున్నారు.

జాతీయ సరస్ మేళా 2026 – ప్రధాన ముఖ్యాంశాలు:

వేదిక & తేదీలు: పున్నమి ఘాట్, విజయవాడ (అక్టోబర్ 13 – 31, 2026).

ప్రారంభోత్సవం: అక్టోబర్ 15న ఉదయం 11:30 గంటలకు భారత రాష్ట్రపతి ద్రౌపది ముర్ము చేతుల మీదుగా ప్రారంభం.

భాగస్వామ్యం: 30కి పైగా రాష్ట్రాలు, కేంద్రపాలిత ప్రాంతాలకు చెందిన స్వయం సహాయక సంఘాల (SHG) నుంచి 1,500 మందికి పైగా మహిళా వ్యాపారవేత్తలు.

ప్రధాన లక్ష్యం: 2029 నాటికి 6 కోట్ల మంది మహిళలను ‘లఖ్‌పతి దీదీ’లుగా తీర్చిదిద్దడమే ధ్యేయం.

‘లఖ్‌పతి దీదీ’ లక్ష్య సాధనకు విప్లవాత్మక అడుగు..

కేంద్ర ప్రభుత్వం అమలు చేస్తున్న ‘దీన్‌దయాళ్ అంత్యోదయ యోజన–జాతీయ గ్రామీణ జీవనోపాధుల కార్యక్రమం’ (DAY-NRLM) లక్ష్యాలకు అనుగుణంగా ఈ మేళా రూపుదిద్దుకుంది. 2029 నాటికి 6 కోట్ల మంది మహిళలను ‘లఖ్‌పతి దీదీ’లుగా మార్చే సంకల్ప సాధనకు ఇది ఎంతగానో దోహదపడనుంది.

మేళాలో పంజాబ్ ఫుల్కారీ, జమ్మూకశ్మీర్ పష్మీనా, తెలంగాణ ఇకత్, తేలియా రుమాల్, మిజోరం సంప్రదాయ వస్త్రాలతో పాటు డోక్రా కళాకృతులు, ఇత్తడి, చెక్క హస్తకళలు ప్రదర్శనకు రానున్నాయి. అలాగే దేశవ్యాప్త వంటకాలను రుచి చూపేందుకు 50 ప్రత్యేక ఫుడ్ స్టాళ్లను ఏర్పాటు చేస్తున్నారు. మేళా ప్రాంగణంలో ఏర్పాటు చేస్తున్న 16 అడుగుల ఎత్తైన ‘శక్తి–ది స్పిరిట్ ఆఫ్ లఖ్ పతి దీదీ’ ప్రత్యేక నిర్మాణం మహిళల సమష్టి సాధికారతకు, ఆర్థిక స్వావలంబనకు ప్రతీకగా నిలవనుంది.