సిఎం నివాస ముట్టడికి పిలుపు.. టేక్మాల్‌లో తెలంగాణ ఉద్యమకారుల ముందస్తు అరెస్ట్..
- పోలీసుల అప్రమత్తత!
- ఉద్యమకారులకు హామీల అమలులో జాప్యంపై టీయుఎఫ్ ఆగ్రహం..
- హైదరాబాద్ ప్రయాణాన్ని అడ్డుకున్న పోలీసులు..
టేక్మాల్ / మెదక్ ఈక్షణం, అక్టోబర్ 26: తెలంగాణ ఉద్యమకారులకు గతంలో ఇచ్చిన హామీల అమలులో ప్రభుత్వం తీవ్ర జాప్యం చేస్తోందని ఆరోపిస్తూ తెలంగాణ ఉద్యమకారుల ఫోరం (TUF) పిలుపునిచ్చిన హైదరాబాద్ సీఎం నివాస ముట్టడి ఆందోళనకు పోలీసులు అడ్డుకట్ట వేశారు. అక్టోబర్ 26న రాజధానిలో నిర్వహించ తలపెట్టిన ఈ ముట్టడి కార్యక్రమానికి తరలివెళ్లకుండా మెదక్ జిల్లా టేక్మాల్ మండల పరిధిలోని పలువురు ప్రధాన ఉద్యమకారులను పోలీసులు ముందస్తుగా అదుపులోకి తీసుకుని అరెస్ట్ చేశారు.
సీఎం నివాస ముట్టడికి హెచ్చరిక!
తెలంగాణ మలిదశ ఉద్యమంలో ప్రాణాలు, సమయాన్ని పణంగా పెట్టిన ఉద్యమకారులకు సంక్షేమ ఫలాలు, పింఛన్లు, ఇతర హామీల అమలులో తీవ్ర అన్యాయం జరుగుతోందని TUF నాయకులు విమర్శిస్తున్నారు. తమ న్యాయమైన డిమాండ్లను నెరవేర్చాలని డిమాండ్ చేస్తూ అక్టోబర్ 26న హైదరాబాద్‌లోని ముఖ్యమంత్రి నివాసాన్ని ముట్టడించేందుకు రాష్ట్రవ్యాప్తంగా తరలిరావాలని ఫోరం పిలుపునిచ్చింది.
ఈ క్రమంలో ఎలాంటి అవాంఛనీయ సంఘటనలు చోటుచేసుకోకుండా ఉన్నతాధికారుల ఆదేశాల మేరకు టేక్మాల్ పోలీసు యంత్రాంగం రంగంలోకి దిగింది.
శాంతిభద్రతల పరిరక్షణే ధ్యేయం!
టేక్మాల్ మండల పరిధిలోని పలు అనుబంధ సంఘాల ప్రతినిధులు, ఉద్యమకారులు చలో హైదరాబాద్‌కి సిద్ధమవుతుండటంతో పోలీసులు ముందస్తు అదుపులోకి తీసుకుని ఠాణాకు తరలించారు. ఈ సందర్భంగా పోలీసులు మాట్లాడుతూ.. చట్టవ్యతిరేకమైన ఆందోళనలు, శాంతిభద్రతల సమస్యలు తలెత్తకుండా ముందస్తుగా ఈ చర్యలు తీసుకున్నట్లు స్పష్టం చేశారు.
ఈ ముందస్తు అరెస్టుల చర్యల్లో ఏఎస్ఐ జగదీశ్వర్, పోలీసు సిబ్బంది రాజు, అశోక్, రవి పాల్గొన్నారు. క్షేత్రస్థాయి పరిస్థితులను నిరంతరం పర్యవేక్షిస్తున్నామని పోలీసులు వెల్లడించారు.
