హైదరాబాద్‌లో భారీ వర్షం.. నాలాలో పడ్డ జెప్టో డెలివరీ బాయ్..
- అస్తవ్యస్తంగా ట్రాఫిక్..
- కేబీఆర్ పార్క్ పరిసర ప్రాంతాల్లో నిలిచిపోయిన వాహనాలు..
- విఠల్ రావు నగర్ వద్ద వరద నీటి ఉధృతికి కొట్టుకుపోయిన డెలివరీ బాయ్ అర్జున్ కుమార్!
- కాపాడిన ఎన్డీఆర్ఎఫ్ సిబ్బంది
హైదరాబాద్ ఈక్షణం, అక్టోబర్ 30: భాగ్యనగరంలోని పలు ప్రాంతాల్లో ఉన్నట్టుండి కురిసిన భారీ వర్షం ప్రజలను, వాహనదారులను తీవ్ర ఇబ్బందులకు గురిచేసింది. అకస్మాత్తుగా కురిసిన వర్షం వల్ల రహదారులపై భారీగా ప్రవాహ నీరు చేరడంతో నగరంలోని పలు కీలక ప్రాంతాల్లో ట్రాఫిక్ స్తంభించిపోయింది. ముఖ్యంగా కేబీఆర్ పార్క్ (KBR Park) చుట్టూ ఉన్న రహదారులపై కిలోమీటర్ల మేర వాహనాలు నిలిచిపోయి భారీ ట్రాఫిక్ జామ్ ఏర్పడింది.
అలాగే, ఐటీ కారిడార్ పరిధిలోని మాదాపూర్ ప్రాంతంలో వరద నీటి ఉధృతి కారణంగా ఓ విషాదకర సంఘటన చోటుచేసుకుంది.
వరద ఉధృతికి అదుపుతప్పి నాలాలో పడ్డ జెప్టో డెలివరీ బాయ్..
మాదాపూర్‌లోని విఠల్ రావు నగర్ వద్ద భారీగా ప్రవహిస్తున్న వరద నీటిలో బైక్‌పై వెళ్తున్న జెప్టో (Zepto) డెలివరీ బాయ్ అర్జున్ కుమార్ (46) ప్రవాహానికి అదుపుతప్పారు. రోడ్డు పక్కనే ఉధృతంగా ప్రవహిస్తున్న నాలాలో ఆయన బైక్‌తో సహా పడిపోయారు. అకస్మాత్తుగా జరిగిన ఈ ఘటనతో స్థానికులు తీవ్ర దిగ్భ్రాంతికి గురయ్యారు.
సకాలంలో స్పందించి ప్రాణాలు కాపాడిన NDRF!
విషయం తెలుసుకున్న జాతీయ విపత్తు స్పందన దళం (NDRF) మరియు జిహెచ్ఎంసి డిజాస్టర్ రెస్పాన్స్ టీమ్స్ (DRF) హుటాహుటిన ఘటనా స్థలానికి చేరుకున్నాయి. నాలాలో చిక్కుకుపోయిన అర్జున్ కుమార్‌ను అత్యంత సాహసంతో గాలించి, సురక్షితంగా బయటకు తీశారు. ఎన్డీఆర్ఎఫ్ సిబ్బంది సకాలంలో స్పందించి రక్షించడంతో పెద్ద ప్రమాదం తప్పినట్లయింది. మరోవైపు నగరంలో వర్షం కురుస్తున్న నేపథ్యంలో అత్యవసరమైతే తప్ప రోడ్లపైకి రావద్దని, మెయిన్ రోడ్లు మరియు నాలాల పొంటి ప్రయాణించేటప్పుడు వాహనదారులు అప్రమత్తంగా ఉండాలని ట్రాఫిక్ పోలీసులు మరియు అధికారులు సూచించారు.
