విద్యార్థులకు నాణ్యమైన విద్య, మెరుగైన వసతులు కల్పించాలి: కలెక్టర్ ప్రతిమా సింగ్
- టేక్మాల్ ప్రభుత్వ జూనియర్ కళాశాలను ఆకస్మికంగా తనిఖీ చేసిన జిల్లా కలెక్టర్ ప్రతిమా సింగ్
- కళాశాలలో తరగతి గదులు, సైన్స్ ల్యాబ్స్, మధ్యాహ్న భోజనం మరియు వసతులను పరిశీలించిన కలెక్టర్..
- ముఖ గుర్తింపు (ఫేషియల్ అటెండెన్స్) తప్పనిసరి..
టేక్మాల్ / మెదక్ ఈ క్షణం, అక్టోబర్ 29: ప్రభుత్వ పాఠశాలలు మరియు కళాశాలల్లో చదువుతున్న విద్యార్థులకు నాణ్యమైన విద్యతో పాటు అన్ని మెరుగైన వసతులు కల్పించాలని మెదక్ జిల్లా కలెక్టర్ ప్రతిమా సింగ్ స్పష్టం చేశారు. బుధవారం టేక్మాల్ మండల కేంద్రంలోని ప్రభుత్వ జూనియర్ కళాశాలను కలెక్టర్ ఆకస్మికంగా తనిఖీ చేశారు.
ఈ తనిఖీ సందర్భంగా కళాశాలలో విద్యాబోధన తీరు, విద్యార్థుల హాజరు శాతం, నిర్మాణంలో ఉన్న సైన్స్ ల్యాబ్‌లను ఆమె క్షుణ్ణంగా పరిశీలించారు.
తరగతి గదుల్లో విద్యార్థులతో ముచ్చట..
వివిధ తరగతి గదులను సందర్శించిన కలెక్టర్ ప్రతిమా సింగ్.. విద్యార్థులతో నేరుగా మాట్లాడి ఉపాధ్యాయులు చెబుతున్న పాఠాలపై బోధనా తీరును అడిగి తెలుసుకున్నారు. సైన్స్, గణితం, సాంఘిక శాస్త్రాలతో పాటు హెల్త్‌కేర్, రిటైల్ ఒకేషనల్ కోర్సుల తరగతులను పరిశీలించారు.
అన్ని తరగతుల్లోనూ విద్యార్థుల హాజరు శాతం వంద శాతం నమోదయ్యేలా చర్యలు తీసుకోవాలని, హాజరు విషయంలో ‘ముఖ గుర్తింపు’ (ఫేషియల్ అటెండెన్స్) తప్పనిసరిగా అమలు చేయాలని ఉపాధ్యాయులను కఠినంగా ఆదేశించారు.
మౌలిక వసతులు, ల్యాబ్ సౌకర్యాలపై ప్రత్యేక దృష్టి!
పాఠశాలలో విద్యార్థులకు అందిస్తున్న మధ్యాహ్న భోజనం, హాస్టల్ వసతులు, ల్యాబ్ సౌకర్యాలను కలెక్టర్ స్వయంగా పరిశీలించారు. తరగతి గదుల్లో ఫ్యాన్లు, ట్యూబ్‌లైట్లు తదితర విద్యుత్ పరికరాలు సక్రమంగా పనిచేసేలా చూడాలని, మరమ్మతులు అవసరమైన వాటిని వెంటనే బాగు చేయించాలని అధికారులను ఆదేశించారు.
ఈ సందర్భంగా విద్యార్థులతో ముచ్చటించిన కలెక్టర్.. వారి భవిష్యత్ లక్ష్యాలను అడిగి తెలుసుకున్నారు. ఉన్నత స్థాయిలకు చేరుకోవాలనే లక్ష్యంతో క్రమశిక్షణ, పట్టుదలతో చదువుకోవాలని, చదువుతో పాటు క్రీడల్లోనూ రాణించాలని విద్యార్థులను ఆప్యాయంగా ప్రోత్సహించారు.
విద్యార్థులకు ఎలాంటి అసౌకర్యం కలగకుండా నాణ్యమైన విద్యను అందించే బాధ్యత ప్రిన్సిపాల్, ఉపాధ్యాయులపై ఉందని స్పష్టం చేశారు. ఈ తనిఖీ కార్యక్రమంలో తహసీల్దార్ తులసీ రామ్, కళాశాల ప్రిన్సిపాల్ మరియు ఉపాధ్యాయ సిబ్బంది పాల్గొన్నారు.
