బాలాపూర్ లడ్డూ పోరు సిద్ధం.. 2026 వేలంలో పోటీపడనున్న ఆశావహుల పూర్తి జాబితా ఇదే..
- ప్రపంచ ప్రసిద్ధి గాంచిన ‘బాలాపూర్ గణేషుడి’ ప్రసాదం కోసం తీవ్రపోటీ..
- లండన్ ఎన్‌ఆర్‌ఐల నుంచి స్థానిక వ్యాపారవేత్తల వరకు సిద్ధమైన బిడ్డర్లు..
హైదరాబాద్/బాలాపూర్, ఈ క్షణం: విశ్వనగరం హైదరాబాద్‌లో వినాయక శోభాయాత్ర, నిమజ్జన ఉత్సవాల్లో అత్యంత కీలక ఘట్టమైన ‘బాలాపూర్ గణేష్ లడ్డూ’ (Balapur Ganesh Laddu Auction 2026) వేలం పాటకు కౌంట్‌డౌన్ ప్రారంభమైంది. ప్రతి ఏటా సరికొత్త రికార్డులను తిరగరాసే ఈ “బంగారు లడ్డూ”ని దక్కించుకోవడం ద్వారా ఐశ్వర్యం, శుభం సిద్ధిస్తాయని భక్తుల బలమైన విశ్వాసం.
ఈసారి 2026 లడ్డూ వేలం పాటలో పాల్గొనేందుకు స్థానిక ప్రజాప్రతినిధులు, ప్రముఖ వ్యాపారవేత్తలు, విదేశీ ఎన్‌ఆర్‌ఐలతో కూడిన ఆశావహులు పోటాపోటీగా సిద్ధమయ్యారు.
బాలాపూర్ లడ్డూ ప్రధాన ఆశావహులు – 2026 జాబితా:
బాలాపూర్ గణేష్ ఉత్సవ సమితి నిబంధనల ప్రకారం వేలంలో పాల్గొనడానికి ముందుకొచ్చిన ప్రముఖ బిడ్డర్ల జాబితా వివరాలు:
- సామ ప్రణీత్ రెడ్డి – అర్బన్ గ్రూప్ (నివాసం: సాహెబ్‌నగర్)
- మర్రి రవికిరణ్ రెడ్డి – (నివాసం: చంపాపేట్)
- కందాడ శాలిని వీరేందర్ రెడ్డి – కేవీఆర్ ఫ్లవర్ మర్చంట్ (నివాసం: చంపాపేట్)
- కంచర్ల శివ రెడ్డి – (నివాసం: హస్తినాపురం)
- సామ దయానంద్ రెడ్డి & సామ వరణంద్ రెడ్డి – ది సుషీ కో. (లండన్, UK)
- గడ్డం నవీన్ రెడ్డి – జీఎన్‌ఆర్ డెవలపర్స్ (నివాసం: హస్తినాపురం)
- శ్రీకాంత్ – పీఎస్‌కే గ్రూప్
- ఇబ్రామ్ ప్రత్యూష్ – (నివాసం: బాలాపూర్)
- రాజనాల రితున్ రెడ్డి – (నివాసం: బాలాపూర్)
బాలాపూర్ లడ్డూ వేలం విశేషాలు:
భారీ అంచనాలు: 1994లో కేవలం రూ.450తో ప్రారంభమైన బాలాపూర్ లడ్డూ వేలం పాట, రికార్డుల పరంపరతో గత ఏడాది రూ.35 లక్షల మార్కును తాకింది. ఈసారి ఈ రికార్డు మరింత పెరిగే అవకాశం ఉందని ఉత్సవ కమిటీ అంచనా వేస్తోంది.
అంతర్జాతీయ స్థాయిలో పోటీ: స్థానిక బాలాపూర్ ప్రజలతో పాటు లండన్ నుంచి వచ్చిన ‘ది సుషీ కో.’ ప్రతినిధులు సామ దయానంద్ రెడ్డి, సామ వరణంద్ రెడ్డి పోటీలో నిలవడం ఈసారి ప్రత్యేక ఆకర్షణగా మారింది.
సామాజిక అభివృద్ధికి నిధులు: ఈ వేలం పాట ద్వారా సమకూరిన సొమ్మును బాలాపూర్ గ్రామాభివృద్ధి, ప్రభుత్వ పాఠశాలలు, ఆలయాల పునర్నిర్మాణ కార్యక్రమాలకు ఉత్సవ సమితి వినియోగిస్తుంది.
బాలాపూర్ బొడ్రాయి చౌరస్తా వద్ద ఉదయం గ్రామ ప్రదక్షిణ ముగిసిన అనంతరం వేలం పాట ప్రారంభం కానుంది. ఈసారి రికార్డు స్థాయిలో ధర పలికే అవకాశమున్న ఈ ‘బంగారు లడ్డూ’ను ఎవరు దక్కించుకోబోతున్నారోనన్న ఉత్కంఠ భాగ్యనగరంలో నెలకొంది.
