Physical Address
304 North Cardinal St.
Dorchester Center, MA 02124
22A జాబితాపై సమగ్ర విచారణ.. బాధ్యులపై కఠిన చర్యలు: మంత్రి కోమటిరెడ్డి
- మధ్యతరగతి, పేదలకు అన్యాయం జరిగితే ఊరుకోను: మంత్రి కోమటిరెడ్డి వెంకటరెడ్డి
- పొరపాటున జరిగిందా.. ఉద్దేశపూర్వకంగానా తేలుస్తాం – బాధితులకు న్యాయం చేస్తాం
- యాదగిరిగుట్టలో 42 వేల ఎకరాలను నిషేధిత జాబితాలో చేర్చిన విషయాన్ని సీఎంకు ముందే చెప్పా
- 30 శాతం కమిషన్ల వ్యవహారంపైనా దర్యాప్తు
- సీఎం అమెరికా పర్యటన అనంతరం శ్వేతపత్రం విడుదల చేస్తాం
నల్లగొండ, ఈ క్షణం: తెలంగాణలో 22A నిషేధిత భూముల జాబితా వ్యవహారంపై రాష్ట్ర ప్రభుత్వం సీరియస్గా దృష్టి సారించిందని రాష్ట్ర మంత్రి కోమటిరెడ్డి వెంకటరెడ్డి తెలిపారు. 22A జాబితాలో చోటుచేసుకున్న అక్రమాలు, అవకతవకలపై సమగ్ర విచారణ చేపడతామని, బాధ్యులు ఎవరైనా కఠిన చర్యలు తప్పవని స్పష్టం చేశారు. ఇటీవల 22A భూముల అంశం రాష్ట్రవ్యాప్తంగా తీవ్ర చర్చకు దారితీసిన నేపథ్యంలో మంత్రి చేసిన వ్యాఖ్యలు ప్రాధాన్యం సంతరించుకున్నాయి.
అధికారుల పాత్రపైనా విచారణ
22A జాబితా రూపకల్పనలో గత ప్రభుత్వ హయాంలో కీలకంగా పనిచేసిన కొందరు అధికారుల పాత్ర కూడా ఉండే అవకాశం ఉందని కోమటిరెడ్డి వెంకటరెడ్డి అన్నారు. కొందరు అధికారులు ఉద్దేశపూర్వకంగానే వ్యవహరించి ఉండొచ్చన్న అనుమానం వ్యక్తం చేశారు. ఇది పొరపాటున జరిగిందా.. లేక కావాలనే చేశారా అన్న విషయాన్ని పూర్తిస్థాయిలో విచారణ ద్వారా తేలుస్తామని చెప్పారు.
ప్రభుత్వాన్ని అప్రతిష్టపాలు చేసే కుట్ర జరిగి ఉండొచ్చని అనుమానం వ్యక్తం చేసిన మంత్రి.. విచారణలో వాస్తవాలు బయటకు వస్తాయని తెలిపారు. తప్పు ఎవరిదో తేలిన తర్వాత వారిపై ఎలాంటి చర్యలు తీసుకోవాలో నిర్ణయిస్తామని స్పష్టం చేశారు.
బాధితులు ఆందోళన చెందొద్దు
22A జాబితా కారణంగా భూములు నిషేధిత జాబితాలో చేరి ఇబ్బందులు ఎదుర్కొంటున్న బాధితులకు ప్రభుత్వం అండగా ఉంటుందని మంత్రి హామీ ఇచ్చారు. దరఖాస్తులు పెట్టాల్సిన అవసరం లేదని, డబ్బులు చెల్లించాల్సిన అవసరం కూడా లేదని స్పష్టం చేశారు.
ముఖ్యంగా మధ్యతరగతి, పేద కుటుంబాలకు 22A జాబితా వల్ల అన్యాయం జరిగితే సహించబోమని కోమటిరెడ్డి వెంకటరెడ్డి అన్నారు. బాధితులకు న్యాయం జరిగేలా చర్యలు తీసుకుంటామని తెలిపారు.
యాదగిరిగుట్టలో 42 వేల ఎకరాల అంశం
యాదగిరిగుట్ట ప్రాంతంలో సుమారు 42 వేల ఎకరాలను నిషేధిత జాబితాలో చేర్చిన విషయాన్ని ముఖ్యమంత్రి రేవంత్రెడ్డికి నాలుగు నెలల క్రితమే చెప్పినట్లు మంత్రి వెల్లడించారు. ఈ వ్యవహారంలో కొందరు అధికారులు ఉద్దేశపూర్వకంగా వ్యవహరించి ఉండొచ్చన్న కోణంలోనూ విచారణ జరుగుతుందని తెలిపారు.
కమిషన్ల వ్యవహారంపైనా దర్యాప్తు
22A భూముల వ్యవహారంలో 30 శాతం కమిషన్లకు సంబంధించిన ఆరోపణలు కూడా దర్యాప్తులో వెలుగులోకి వస్తాయని మంత్రి పేర్కొన్నారు. భూముల నిషేధిత జాబితా తయారీ, మార్పులు, తొలగింపుల వెనుక ఎవరెవరి పాత్ర ఉందన్న అంశాన్ని కూడా పరిశీలిస్తామని చెప్పారు.
శ్వేతపత్రం విడుదల చేస్తాం
ఈ వ్యవహారంపై పూర్తిస్థాయి విచారణ అనంతరం కీలక వివరాలను ప్రజల ముందు ఉంచుతామని కోమటిరెడ్డి వెంకటరెడ్డి తెలిపారు. ముఖ్యమంత్రి అమెరికా పర్యటన అనంతరం 22A అంశంపై శ్వేతపత్రం విడుదల చేస్తామని ప్రకటించారు.
ప్రభుత్వం మంచి ఉద్దేశంతో పనిచేస్తుంటే కొంతమంది అధికారులు దాన్ని దుర్వినియోగం చేసి ఉండొచ్చని మంత్రి వ్యాఖ్యానించారు. బాధ్యులు ఎవరో విచారణలో తేలిన తర్వాత వారిపై తగిన చర్యలు తీసుకుంటామని స్పష్టం చేశారు.
ప్రతిపక్షాల విమర్శలు అర్థరహితం
22A వ్యవహారంపై ప్రతిపక్షాలు చేస్తున్న విమర్శలకు స్పందిస్తూ.. అవి వాస్తవాలను తెలుసుకోకుండా చేస్తున్న ఆరోపణలేనని మంత్రి కొట్టిపారేశారు. ప్రభుత్వం ఇప్పటికే ఈ అంశాన్ని తీవ్రంగా పరిగణిస్తోందని, విచారణ ద్వారా పూర్తి వాస్తవాలను వెలుగులోకి తీసుకువస్తామని తెలిపారు.
