Breaking News: సీఎం రేవంత్‌రెడ్డిపై మంత్రి కొండా సురేఖ పరోక్ష ఫిర్యాదు.. టీపీసీసీకి సంచలన లేఖ
- బిసి మహిళా నాయకురాలినైన నాపై సామూహిక దాడులు జరుగుతుంటే పార్టీ మౌనం వహించడం బాధాకరం..
- ఎమ్మెల్యేలు, ఎమ్మెల్సీల వెనుక ఉన్న వ్యక్తులపై చర్యలు తీసుకోవాలని టీపీసీసీ క్రమశిక్షణ కమిటీకి లేఖ
హైదరాబాద్, ఈ క్షణం: తెలంగాణ కాంగ్రెస్‌లో అంతర్గత విభేదాలు మరోసారి బహిర్గతమయ్యాయి. మంత్రి కొండా సురేఖ టీపీసీసీ క్రమశిక్షణ కమిటీకి రాసిన లేఖ రాజకీయ వర్గాల్లో తీవ్ర చర్చకు దారితీసింది. తనను, తన కుటుంబ సభ్యులను లక్ష్యంగా చేసుకుని అవమానకర వ్యాఖ్యలు చేస్తున్న ఎమ్మెల్యేలు, ఎమ్మెల్సీల వెనుక ఉన్న వ్యక్తులను గుర్తించి క్రమశిక్షణా చర్యలు తీసుకోవాలని ఆమె కోరారు.
ఒక సీనియర్ బీసీ మహిళా నాయకురాలినైన తనపై తీవ్ర పదజాలంతో సామూహికంగా దాడులు జరుగుతున్న సమయంలో పార్టీ నాయకత్వం మౌనం వహించడం ఆందోళన కలిగిస్తోందని సురేఖ తన లేఖలో పేర్కొన్నట్లు తెలుస్తోంది. పార్టీ విలువలు, క్రమశిక్షణ నియమావళికి విరుద్ధంగా వ్యవహరించే వారిపై కఠిన చర్యలు తీసుకోవాలని ఆమె టీపీసీసీ క్రమశిక్షణ కమిటీని కోరారు.
‘నా కుటుంబాన్ని టార్గెట్ చేస్తున్నారు’
తనను, తన కుటుంబ సభ్యులను ఉద్దేశపూర్వకంగా లక్ష్యంగా చేసుకుని కొందరు ఎమ్మెల్యేలు, ఎమ్మెల్సీలు మీడియా సమావేశాలు నిర్వహిస్తున్నారని సురేఖ ఆరోపించినట్లు సమాచారం. అయితే వారి వెనుక ఉన్న అసలు వ్యక్తులు, సూత్రధారులను గుర్తించాల్సిన అవసరం ఉందని ఆమె స్పష్టం చేసినట్లు తెలుస్తోంది.
ఇటీవల చోటుచేసుకున్న పరిణామాల నేపథ్యంలో ఈ లేఖ ప్రాధాన్యం సంతరించుకుంది. తన కుటుంబ సభ్యుల వ్యాఖ్యలకు తనకు సంబంధం లేదని ఇప్పటికే వివరణ ఇచ్చినప్పటికీ, తనపై వరుసగా విమర్శలు చేయడం వెనుక రాజకీయ ప్రేరణ ఉందన్న భావనను సురేఖ వ్యక్తం చేసినట్లు సమాచారం.
రేవంత్‌పై పరోక్ష విమర్శలు?
తనకు వ్యతిరేకంగా ఎమ్మెల్యేలతో మీడియా సమావేశాలు ఏర్పాటు చేయించడం వెనుక ఎవరున్నారో గుర్తించి చర్యలు తీసుకోవాలని సురేఖ కోరడం రాజకీయంగా కీలకంగా మారింది. ముఖ్యమంత్రి రేవంత్‌రెడ్డి పేరును నేరుగా ప్రస్తావించకపోయినా.. ఎమ్మెల్యేల ప్రెస్‌మీట్‌ వెనుక ఉన్న వ్యక్తులపై చర్యలు తీసుకోవాలన్న డిమాండ్‌ను సీఎం వైపు పరోక్షంగా చూపుతున్నారన్న చర్చ కాంగ్రెస్ వర్గాల్లో జరుగుతోంది.
ముఖ్యంగా పరకాల రాజకీయ పరిణామాలు, ఎమ్మెల్యే రేవూరి ప్రకాష్‌రెడ్డికి సీఎం మద్దతు, ఆ తర్వాత కొండా కుటుంబం నుంచి వచ్చిన విమర్శల నేపథ్యంలో తాజా లేఖ మరింత ప్రాధాన్యం సంతరించుకుంది.
‘పార్టీ నాయకత్వం మౌనం బాధాకరం’
బీసీ మహిళా నాయకురాలిగా తాను ఎదుర్కొంటున్న రాజకీయ దాడులపై పార్టీ నాయకత్వం స్పందించకపోవడం బాధాకరమని సురేఖ పేర్కొన్నట్లు సమాచారం. కాంగ్రెస్ పార్టీ సామాజిక న్యాయం, బలహీన వర్గాల ఆత్మగౌరవం వంటి విలువలకు కట్టుబడి ఉండాలని, వాటికి విరుద్ధంగా వ్యవహరించే వారిపై క్రమశిక్షణా చర్యలు తీసుకోవాలని ఆమె కోరారు.
క్రమశిక్షణ కమిటీ ముందున్న కొత్త అంశం
ఇప్పటికే కొండా సుస్మిత వ్యాఖ్యల వ్యవహారం కాంగ్రెస్‌లో చర్చనీయాంశంగా మారిన నేపథ్యంలో.. తాజాగా మంత్రి కొండా సురేఖ స్వయంగా క్రమశిక్షణ కమిటీకి లేఖ రాయడం పరిస్థితిని మరింత సంక్లిష్టం చేసింది. తనపై విమర్శలు చేస్తున్న నేతలతో పాటు, వారి వెనుక ఉన్న సూత్రధారులపై కూడా చర్యలు తీసుకోవాలని ఆమె కోరడం ద్వారా వివాదాన్ని మరో స్థాయికి తీసుకెళ్లారు.
ఇక ఈ లేఖపై టీపీసీసీ క్రమశిక్షణ కమిటీ ఎలాంటి నిర్ణయం తీసుకుంటుంది? సురేఖ ఆరోపణలపై విచారణ చేపడుతుందా? ఆమె ఆరోపించిన ‘సూత్రధారులు’ ఎవరు? అనే అంశాలు ఇప్పుడు తెలంగాణ కాంగ్రెస్‌లో హాట్‌టాపిక్‌గా మారాయి.
