మీర్‌పేట్: మహిళ నోట్లో గుడ్డలు కుక్కి, కాళ్లు కట్టేసి కిరాతకంగా హతమార్చిన దుండగులు..
- హైదరాబాద్ నగరంలో మరో దారుణ హత్య
- జిల్లెలగూడ శ్రీలక్ష్మి రెసిడెన్సీలో కలకలం..
- కేంద్ర ప్రభుత్వ ఉద్యోగి భార్య అనిత హత్య,
- రక్తపు మడుగులో ఉన్న తల్లిని చూసి తండ్రికి సమాచారం ఇచ్చిన చిన్నారులు!
హైదరాబాద్ ఈక్షణం, నవంబర్ 12: హైదరాబాద్ నగరంలో మరో దారుణ హత్యోదంతం తీవ్ర కలకలం రేపింది. మీర్‌పేట్ పోలీస్ స్టేషన్ పరిధిలోని జిల్లెలగూడ దత్తునగర్‌లో ఉన్న శ్రీలక్ష్మి రెసిడెన్సీలో నివాసముంటున్న కేంద్ర ప్రభుత్వ ఉద్యోగి అరుణ్ కుమార్ భార్య అనిత (35) ను గుర్తుతెలియని దుండగులు అత్యంత కిరాతకంగా హతమార్చారు.
గురువారం ఇంట్లో ఒంటరిగా ఉన్న సమయాన్ని ఆసరాగా చేసుకుని దుండగులు ఈ ఘాతుకానికి పాల్పడినట్లు పోలీసులు ప్రాథమికంగా అంచనా వేస్తున్నారు.
నోట్లో గుడ్డలు కుక్కి, కాళ్లు కట్టేసి ఘాతుకం..
ఇంట్లోకి చొరబడిన దుండగులు అనిత అరుపులు బయటకు వినిపించకుండా ఆమె నోట్లో గుడ్డలు కుక్కి, కాళ్లు చేతులు కట్టేసి దారుణంగా హత్య చేశారు. పాఠశాల నుంచి ఇంటికి తిరిగి వచ్చిన చిన్నారులు ఇంట్లో రక్తపు మడుగులో పడి ఉన్న తల్లిని చూసి ఒక్కసారిగా భయంతో కేకలు వేశారు.
వెంటనే విషయాన్ని తమ తండ్రి అరుణ్ కుమార్‌కు ఫోన్ ద్వారా తెలియజేశారు. హుటాహుటిన ఇంటికి చేరుకున్న అరుణ్ కుమార్, స్థానికుల సహాయంతో మీర్‌పేట్ పోలీసులకు సమాచారం అందించారు.
సీసీటీవీ ఫుటేజీల ఆధారంగా నిందితుల కోసం గాలింపు..
సమాచారం అందుకున్న మీర్‌పేట్ పోలీసులు, ఉన్నతాధికారులు, క్లూస్ టీమ్ మరియు డాగ్ స్క్వాడ్‌తో సంఘటనా స్థలానికి చేరుకుని ఆధారాలు సేకరించారు. ఇది కేవలం దోపిడీ కోసమే జరిగిన హత్యా, లేక పాత కక్షలు ఏమైనా ఉన్నాయా అనే కోణంలో పోలీసులు దర్యాప్తు ముమ్మరం చేశారు. అపార్ట్‌మెంట్ మరియు పరిసర ప్రాంతాల్లోని సీసీటీవీ (CCTV) కెమెరాల ఫుటేజీలను పోలీసులు క్షుణ్ణంగా పరిశీలిస్తున్నారు. మృతదేహాన్ని పోస్టుమార్టం నిమిత్తం ఉస్మానియా ఆసుపత్రికి తరలించి, కేసు నమోదు చేసుకుని నిందితుల కోసం ప్రత్యేక బృందాలతో గాలిస్తున్నారు.
