అంగన్వాడీ ఉద్యోగుల హక్కుల సాధనకు ఆడెపు వరలక్ష్మి కొత్త శంఖారావం

హైదరాబాద్ బ్యూరో, ఈక్షణం: తెలంగాణ రాష్ట్రంలోని అంగన్వాడీ టీచర్లు, హెల్పర్లు, ఇతర ఉద్యోగుల హక్కుల పరిరక్షణ, సంక్షేమం, సమస్యల పరిష్కారమే ప్రధాన లక్ష్యంగా ఆడెపు వరలక్ష్మి కొత్త సంఘానికి శ్రీకారం చుట్టారు. ‘అంగన్వాడీ టీచర్స్ అండ్ ఎంప్లాయీస్ వెల్ఫేర్ అసోసియేషన్’ (ATEWA) పేరుతో రాష్ట్రవ్యాప్తంగా అంగన్వాడీ ఉద్యోగులందరికీ అండగా నిలిచేందుకు ఈ స్వతంత్ర యూనియన్‌ను స్థాపించారు.

హైదరాబాద్‌లోని ఆర్టీసీ క్రాస్ రోడ్స్‌ సమీపంలోని ఘంటసాల కళావేదికలో శుక్రవారం నిర్వహించిన కార్యక్రమంలో సంఘాన్ని అధికారికంగా ప్రారంభించారు. ఈ సందర్భంగా నూతన రాష్ట్ర కమిటీ ఎన్నికలు నిర్వహించగా, సంఘ వ్యవస్థాపక అధ్యక్షురాలిగా ఆడెపు వరలక్ష్మి బాధ్యతలు చేపట్టారు.

అంగన్వాడీ ఉద్యోగుల హక్కుల సాధన కోసం ఆడెపు వరలక్ష్మి గత 13 సంవత్సరాలుగా నిరంతర పోరాటాలు నిర్వహిస్తున్నారు.

మినీ అంగన్వాడీల అప్‌గ్రేడేషన్‌లో కీలక పాత్ర: గతంలో ‘మినీ అంగన్వాడీ టీచర్స్ అసోసియేషన్’ పేరుతో ఉద్యమాన్ని ముందుకు నడిపిస్తూ, రాష్ట్రవ్యాప్తంగా మినీ అంగన్వాడీ కేంద్రాలను ప్రధాన అంగన్వాడీ కేంద్రాలుగా అప్‌గ్రేడ్ చేయించడంలో ఆమె కీలక భూమిక పోషించారు.

విస్తృత స్థాయిలో పనిచేసేందుకు ATEWA ఏర్పాటు: మినీ అంగన్వాడీల అప్‌గ్రేడేషన్ లక్ష్యం నెరవేరిన నేపథ్యంలో, ఇక రాష్ట్రంలోని అంగన్వాడీ టీచర్లు, హెల్పర్లు, ఇతర ఉద్యోగులందరి సమస్యల పరిష్కారం కోసం విస్తృత స్థాయిలో కృషి చేయాలనే సంకల్పంతో ATEWAను స్థాపించినట్లు ఆమె వెల్లడించారు.

Adepu Varalakshmi ATEWA Anganwadi Union Hyderabad

ఈ సందర్భంగా వ్యవస్థాపక అధ్యక్షురాలు ఆడెపు వరలక్ష్మి మాట్లాడుతూ.. అంగన్వాడీ ఉద్యోగులు ఎదుర్కొంటున్న సమస్యల పరిష్కారం, హక్కుల పరిరక్షణ, సంక్షేమం కోసం నూతన సంఘం నిరంతరం పనిచేస్తుందని స్పష్టం చేశారు. ఉద్యోగుల న్యాయమైన డిమాండ్ల సాధనకు ఐక్యంగా పోరాడుతామని తెలిపారు. త్వరలోనే నూతన రాష్ట్ర కమిటీ ఆధ్వర్యంలో సంబంధిత శాఖ డైరెక్టర్‌ను కలిసి అంగన్వాడీ ఉద్యోగుల ప్రధాన సమస్యలు, డిమాండ్లతో కూడిన తొలి వినతిపత్రాన్ని అందజేయనున్నట్లు చెప్పారు. రాష్ట్రవ్యాప్తంగా ఉన్న ఉద్యోగులందరినీ ఒకే వేదికపైకి తీసుకువచ్చి వారి సమస్యల పరిష్కారానికి కృషి చేస్తామని పేర్కొన్నారు.

ఘంటసాల కళావేదికలో జరిగిన కార్యక్రమంలో ATEWA నూతన రాష్ట్ర కమిటీని ఎన్నుకున్నారు. వ్యవస్థాపక అధ్యక్షురాలు ఆడెపు వరలక్ష్మి నాయకత్వంలో రాష్ట్ర కమిటీ సభ్యులుగా రేణుక, శోభ, సునీత, లక్ష్మి, కవిత, జ్యోతి, వనమాల, వెంకట రమణ, శోభ తదితరులు ఎన్నికయ్యారు. ఈ కార్యక్రమంలో వివిధ జిల్లాలకు చెందిన అంగన్వాడీ ప్రతినిధులు పాల్గొని నూతన సంఘం ఏర్పాటుపై హర్షం వ్యక్తం చేశారు.