ఆసుపత్రి కార్మికులకు రూ.26 వేల వేతనం: నల్గొండలో ఏఐటీయూసీ నిరసన
- ఆసుపత్రి కార్మికుల కొత్త టెండర్లు వేసి రూ. 26 వేల వేతనం ఇవ్వాలి’:
- నల్గొండలో ఏఐటీయూసీ నిరసన.. పల్లా దేవేందర్ రెడ్డి డిమాండ్!
- నాలుగేళ్లు దాటినా పాత టెండర్లతోనే కార్మికులకు తీవ్ర నష్టం..
- ఆర్‌ఎంఓకు వినతిపత్రం, స్పందించకుంటే రాష్ట్రవ్యాప్తంగా నిరవధిక సమ్మె చేస్తామని హెచ్చరిక!
నల్గొండ ఈక్షణం, నవంబర్ 12: రాష్ట్రంలోని ప్రభుత్వ ఆసుపత్రుల్లో పనిచేస్తున్న శానిటేషన్, పేషెంట్ కేర్, సెక్యూరిటీ గార్డ్ కార్మికులకు వెంటనే కొత్త టెండర్లు పిలిచి, కనీస వేతనం రూ. 26,000 చెల్లించాలని ఏఐటీయూసీ (AITUC) మెడికల్ కాంట్రాక్ట్ వర్కర్స్ యూనియన్ రాష్ట్ర కార్యదర్శి పల్లా దేవేందర్ రెడ్డి ప్రభుత్వాన్ని డిమాండ్ చేశారు.
గురువారం నల్గొండ జిల్లా కేంద్ర ఆసుపత్రిలో ఏఐటీయూసీ ఆధ్వర్యంలో కార్మికులు పెద్ద ఎత్తున నిరసన వ్యక్తం చేసి, అనంతరం ఆసుపత్రి ఆర్‌ఎంఓ (RMO) కు వినతిపత్రం (మెమోరాండం) అందజేశారు.
నాలుగేళ్లు దాటినా కొత్త టెండర్లు లేవు..
ఈ సందర్భంగా పల్లా దేవేందర్ రెడ్డి మాట్లాడుతూ.. నిబంధనల ప్రకారం ప్రతి మూడు సంవత్సరాలకు ఒకసారి ఆసుపత్రిలో కొత్త టెండర్లు వేయాల్సి ఉన్నప్పటికీ, ఈసారి నాలుగు సంవత్సరాలు దాటినా నేటికీ పాత టెండర్లతోనే కొనసాగిస్తున్నారని మండిపడ్డారు. దీనివల్ల కార్మికులు తీవ్రంగా నష్టపోతున్నారని ఆవేదన వ్యక్తం చేశారు.
కరోనా విపత్కర పరిస్థితుల్లో సైతం ప్రాణాలు పణంగా పెట్టి రోగులకు సేవలు అందించిన కార్మికులకు ఎలాంటి బీమా సౌకర్యం కూడా లేదని, నిత్యావసర సరుకుల ధరలు ఆకాశాన్ని అంటుతున్నా వేతనాలు పెంచకపోవడం శోచనీయమని అన్నారు.
స్పందించకుంటే రాష్ట్రవ్యాప్త నిరవధిక సమ్మె..
రాష్ట్రంలో కాంట్రాక్ట్ కార్మికులకు పీఎఫ్, ఈఎస్ఐ సక్రమంగా చెల్లించడం లేదని, కనీస వేతనాల చట్టాలు ఎక్కడా అమలు కావడం లేదని దేవేందర్ రెడ్డి ఆరోపించారు. ప్రభుత్వం తక్షణమే స్పందించి కొత్త టెండర్లు నిర్వహించకపోతే రాష్ట్రవ్యాప్తంగా నిరవధిక సమ్మెకు దిగాల్సి వస్తుందని హెచ్చరించారు. ఈ నిరసన కార్యక్రమంలో ఏఐటీయూసీ డివిజన్ కార్యదర్శి విశ్వనాధుల లెనిన్, మెడికల్ కాంట్రాక్ట్ వర్కర్స్ యూనియన్ అధ్యక్షులు పి. ఎల్లమ్మ, నాయకులు పద్మ, భాగ్యమ్మ, ఉషమ్మ, నాగమణి, లక్ష్మి, ఇందిర, రజియా బేగం, సుశీల, మంగమ్మ, యాదమ్మ తదితరులు పాల్గొన్నారు.
